Reglugerð

1. gr.
Sjóðurinn heitir Landsmennt, fræðslusjóður og er með heimili og varnarþing í Reykjavík. Sjóðurinn byggir á grundvelli kjarasamnings Samtaka atvinnulífsins við Verkamannasamband Íslands og Landssamband iðnverkafólks frá 13. apríl árið 2000. Sjóðurinn starfar nú samkvæmt kjarasamningi Samtaka atvinnulífsins og aðildarfélaga Starfsgreinasambands Íslands á landsbyggðinni frá 7. mars 2004 og síðari kjarasamningum aðila. Landsmennt fræðslusjóður starfar með því skipulagi og markmiði sem segir í þessari reglugerð og nánari reglum sem stjórn sjóðsins setur.

2.gr.
Markmið sjóðsins er annars vegar að auka möguleika fyrirtækja á að þróa starfssvið/starfsemi sína og bæta þannig samkeppnishæfni og hins vegar að efla starfsmenntun almennra starfsmanna þeirra með það fyrir augum að þeir verði færari til að takast á við sífellt fjölbreyttari verkefni. Til þess að ná nefndum markmiðum verður m.a. leitað samstarfs við aðra fræðslusjóði, fræðslustofnanir, stéttarfélög, fyrirtæki og opinbera aðila.

3. gr.
Meginhlutverk Landsmenntar fræðslusjóðs er að sinna stuðningsverkefnum og þróunar- og hvatningaraðgerðum í starfsmenntun fyrir almenna starfsmenn.

Sjóðurinn:
• Veitir einstaklingum og fyrirtækjum styrki vegna starfsmenntunar samkvæmt nánari reglum stjórnar
• Styður við skipulag og stefnumótun fræðslu í fyrirtækjum
• Styrkja nýjungar í námsefnisgerð og endurskoðun námsefnis

Landsmennt sinnir hlutverki sínu ennfremur með eftirfarandi hætti:
• Veitir styrki til þeirra verkefna sem aðilar semja sérstaklega um í kjarasamningi
• Hefur frumkvæði að þróunarverkefnum í starfsmenntun
• Leggur áherslu á kynningar- og hvatningarstarf er tengist starfsmenntun

Jafnframt setur stjórn sér nánari vinnureglur um úthlutun. Stéttarfélög innan SGS sem aðild eiga að sjóðnum sjá um úthlutun einstaklingsstyrkja í umboði Landsmenntar.

4.gr.
Stjórn Landsmenntar skal skipuð sex mönnum og fjórum til vara. Þrír af þeim skulu skipaðir af Samtökum atvinnulífsins og þrír frá hlutaðeigandi stéttarfélögum. Stjórn kýs sér formann og varaformann til tveggja ára í senn. Þá skipa Samtök atvinnulífsins tvo varamenn og hlutaðeigandi stéttarfélög tvo. Stjórnin skal halda gerðabók og rita í hana samþykktir sínar. Til þess að samþykkt sé lögmæt, þarf meirihluti stjórnarmanna að vera henni fylgjandi.

5.gr.
Tekjur í sjóð Landsmenntar eru:
• Samningsbundin gjöld atvinnurekenda (starfsmenntaiðgjald) eins og semst um á hverjum tíma. Við undirritun þessarar reglugerðar er starfsmenntaiðjgald 0,30% af heildarlaunum félagsmanna aðildarfélaga sjóðsins.
• Styrkir úr öðrum sjóðum (erlendum jafnt sem innlendum) til verkefna sem samrýmast markmiðum sjóðsins
• Vaxtatekjur.
• Aðrar tekjur, þmt. þjónustutekjur fyrir umsýslu og rekstur skyldra fræðslusjóða.

6.gr.

Reikningsár Landsmenntar er almanaksárið. Ársreikningar sjóðsins skulu liggja fyrir eigi síðar en í lok apríl ár hvert og skal endurskoðaður af löggiltum endurskoðenda sem aðilar koma sér saman um. Sjóðurinn verður ávaxtaður á þann hátt sem stjórn telur hagkvæmast á hverjum tíma. Forstöðumanni sjóðsins er heimilt, í samráði við stjórn, að semja við aðra viðurkennda aðila um færslu bókhalds.
Eigi síðar en í júní ár hvert skal haldinn sameiginlegur fundur stjórnar, varastjórnar og endurskoð-anda sjóðsins þar sem kynnt verður ársskýrsla og ársreikningur sjóðsins og ef breytingar verða á skipan stjórnar-varastjórnar og annað er varðar starfsemi sjóðsins. Ársskýrsla og ársreikningur Landsmenntar verði jafnframt aðgengileg á heimasíðu sjóðsins, landsmennt.is

7.gr.
Stjórn stýrir starfi sjóðsins í samræmi við 3. gr. þessarar reglugerðar. Stjórn ræður framkvæmdastjóra sjóðsins sem stýrir skrifstofu sjóðsins og starfsmannahaldi. Skrifstofa sjóðsins annast umsýslu og reikningshald sjóðsins, framfylgir samningum vegna innheimtu tekna og innir af hendi greiðslur úr honum. Stjórnin skilar ársreikningum og ársskýrslu um störf sín til eigenda sjóðsins.

8.gr.
Um önnur ónefnd atriði vísast til kjarasamnings SA og ofangreindra stéttarfélaga sem í gildi eru á hverjum tíma. Breytingar á þessari reglugerð skulu hljóta samhljóða samþykki stjórnar sjóðsins. Samþykkt og undirritað af fulltrúum frá Samtökum atvinnulífsins og aðildarfélögum Starfsgreinasambands Íslands á landsbyggðinni í stjórn Landsmenntar.

Reykjavík,  26. mars 2026